पुणे,दि.30 : परिस्थिती कितीही कठीण असली तरी जिद्द, चिकाटी, कठोर मेहनत व संयम आणि सातत्य असेल तर यशाचा मार्ग नक्की सापडतो,” याचाच एक जिवंत आणि प्रेरणादायी वस्तुपाठ पुणे विद्यापीठाच्या विधी शाखेच्या निकालातून समोर आला आहे. आयुष्यात अनेक मोठी संकटे,अडचणी, प्रतिकूल परिस्थितीवर मात करत ३२ वर्षीय अभिजीत अशोक मोरे यांनी सामाजिक ध्येय डोळ्यासमोर ठेवून, २०२६ मध्ये पुणे विद्यापीठातून प्रचंड मेहनतीने उत्तम गुण मिळवून, आपली LL.B (कायद्याची पदवी) पूर्ण केली असून, वकील म्हणून अधिकृतपणे पदवी संपादन केली आहे.
अपयशाने खचून न जाता ध्येयावर लक्ष केंद्रित केले तर यशाचे शिखर कसे सर करता येते, याचे अभिजीत मोरे हे एक उत्तम उदाहरण ठरले आहेत.
ध्येयाची सुरुवात आणि स्पर्धा परीक्षांचा टप्पा :
समाजासाठी काहीतरी भरीव करण्याची आणि वंचित घटकांना न्याय मिळवून देण्याची तीव्र इच्छा अभिजीत यांच्या मनात बालपणापासूनच होती. समाजसेवेचे हे स्वप्न उराशी बाळगून त्यांनी आपल्या करिअरची सुरुवात केली होती. सुरुवातीला स्पर्धा परीक्षांच्या (MPSC/UPSC) माध्यमातून प्रशासकीय सेवेत प्रवेश करून समाजसेवेचे ध्येय पूर्ण करण्याचा त्यांनी निर्धार केला होता.
Flipkart Best Offer... Headphones & Speakers : Upto 80% Off... Limited Time Deal! Shop Now! For Special Discount Offers Click on Below 'Buy Now'
यासाठी त्यांनी अपार मेहनत घेतली; मात्र नियतीच्या मनात काही वेगळेच होते. स्पर्धा परीक्षांमधील त्यांचे प्रयत्न अपेक्षेप्रमाणे यशस्वी होऊ शकले नाहीत. स्पर्धा परीक्षेत आलेले हे अपयश कोणत्याही तरुणाला खचवून टाकणारे ठरले असते, परंतु अभिजीत यांनी हार मानली नाही. अपयशाने खचून न जाता त्यांनी समाजसेवेचा एक नवा आणि तितकाच प्रभावी मार्ग निवडण्याचे ठरवले, तो मार्ग म्हणजे 'कायदा आणि न्याय व्यवस्था'.
बालपण आणि वडिलांचा सायकलवरून सुरू असलेला संघर्ष :
अभिजीत मोरे यांचा हा प्रवास अत्यंत साध्या, गरिबीच्या आणि संघर्षमय परिस्थितीतून सुरू झाला. त्यांचे मूळ कुटुंब अत्यंत बेताच्या आर्थिक परिस्थितीत जगत होते. त्यांचे वडील अशोक मोरे हे हिऱ्याच्या कारखान्यात एक साधे मजूर म्हणून काम करत असत. कुटुंबाचा गाडा चालवण्यासाठी आणि मुलांच्या शिक्षणासाठी त्यांच्या वडिलांनी आयुष्यभर अपार कष्ट उपसले. हिऱ्याच्या कारखान्यात कामाला जाण्यासाठी ते दररोज तब्बल २० ते २५ किलोमीटरचा प्रवास सायकलवरून करत असत. ऊन असो, पाऊस असो की थंडी, कोणत्याही ऋतूत न थकता वडिलांनी केलेले हे कष्ट आणि त्यांचा प्रामाणिकपणा हाच अभिजीत यांच्या आयुष्यातील सर्वात मोठा आदर्श आणि प्रेरणास्थान ठरला. वडिलांच्या या संघर्षाची जाणीव ठेवूनच अभिजीत यांनी शिक्षणात कधीही खंड पडू दिला नाही.
आर्थिक चणचण, मुंबई ते पुणे प्रवास आणि कोचिंग क्लासेसचा आधार :
आर्थिक परिस्थिती अत्यंत हलाखीची असूनही शिक्षणाची जिद्द कायम ठेवत अभिजीत यांनी मुंबईतील एका मराठी शाळेत आपले प्राथमिक व माध्यमिक शिक्षण पूर्ण केले. मराठी माध्यमातून शिक्षण घेतल्यानंतर, स्पर्धा परीक्षांबद्दल माहिती मिळाल्यावर त्यांनी पुण्यात येऊन अभ्यास करण्याचा निर्णय घेतला. २०१६ मध्ये एका शिष्यवृत्तीच्या (Scholarship) मदतीने त्यांनी पुण्याची वाट धरली.
पुण्यात आल्यानंतर स्पर्धा परीक्षांच्या नामांकित क्लासेसची भरमसाठ फी भरणे त्यांच्या आर्थिक परिस्थितीच्या पलिकडचे होते. यामुळे त्यांनी कोणत्याही क्लासवर अवलंबून न राहता, स्वतःच्या मेहनतीवर आणि 'सेल्फ स्टडी' (Self-study) च्या जोरावर अभ्यास करण्याचा धाडसी निर्णय घेतला.
पुण्यासारख्या शहरात राहण्याचा खर्च, पुस्तकांचा खर्च आणि दैनंदिन राहणीमान सांभाळणे हे एक मोठे आव्हान होते. यावर मात करण्यासाठी त्यांनी लहान मुलांचे कोचिंग क्लासेस (खाजगी शिकवणी) घेण्यास सुरुवात केली. दिवसभर स्वतः अभ्यास करणे आणि संध्याकाळी क्लासेस घेऊन स्वतःचा खर्च भागवणे, असा त्यांचा दुहेरी संघर्ष पुण्यात सुरू राहिला.
कौटुंबिक संकटांची मालिका आणि भावाचा खंबीर पाठिंबा :
अभिजीत यांच्या संघर्षाचा काळ एवढ्यावरच थांबला नाही, तर त्यांच्या कौटुंबिक आयुष्यात संकटांची मालिका सुरू झाली. २०१७ मध्ये त्यांचे वडील अशोक मोरे यांना अचानक अर्धांगवायूचा (Paralysis) तीव्र झटका आला. वडिलांच्या या आजारपणामुळे संपूर्ण कुटुंब हादरले. अशा अत्यंत संवेदनशील काळात स्वतःच्या करिअरची आणि स्वप्नांची पर्वा न करता, अभिजीत यांनी अभ्यासाला काही काळ बाजूला ठेवले आणि वडिलांची अहोरात्र सेवा केली.
वडिलांची प्रकृती हळूहळू सुधारत असतानाच, २०१९ मध्ये त्यांच्या मातोश्रींचे अचानक निधन झाले. आईच्या जाण्याने मोरे कुटुंबावर दुःखाचा डोंगर कोसळला. आर्थिक विवंचना आणि आईचे छत्र हरपल्यामुळे कुटुंब पूर्णपणे कोलमडण्याच्या उंबरठ्यावर होते. अशा अत्यंत कठीण आणि आणीबाणीच्या काळात अभिजीत यांचे लहान भाऊ आशिष अशोक मोरे हे कुटुंबासाठी ढाल बनून उभे राहिले. आशिष यांनी घराची संपूर्ण जबाबदारी स्वतःच्या खांद्यावर घेतली आणि अभिजीत यांना त्यांच्या ध्येयापासून मागे न हटण्याचा सल्ला दिला. भावाच्या या खंबीर आधारामुळेच अभिजीत पुन्हा एकदा उभे राहू शकले.
कायद्याचा मार्ग आणि वकिली पदवीवर मोहर :
स्पर्धा परीक्षांमध्ये यश हुकले असले तरी, समाजातील शेवटच्या घटकासाठी काम करण्याची अभिजीत यांची भावना तसूभरही कमी झाली नव्हती. प्रशासकीय सेवेत जाता आले नाही तर काय झाले, कायद्याच्या चौकटीत राहूनही सामान्य माणसाला, गरीबांना न्याय मिळवून देता येऊ शकतो, या विचाराने त्यांनी विधी शाखेत (Law) प्रवेश घेण्याचा निर्णय घेतला. पुणे विद्यापीठातून त्यांनी LL.B चा अभ्यासक्रम सुरू केला.
हा प्रवासही सोपा नव्हता.
कौटुंबिक जबाबदाऱ्या, आर्थिक ओढाताण आणि अभ्यासाचा ताण या सर्वांचा ताळमेळ घालत त्यांनी दिवस-रात्र एक केली. सातत्य, कठोर परिश्रम आणि प्रचंड आत्मविश्वासाच्या जोरावर त्यांनी अखेर २०२६ मध्ये पुणे विद्यापीठातून विधी पदवी (LL.B) यशस्वीरित्या प्राप्त केली आणि आपले वकील बनण्याचे स्वप्न पूर्ण केले.
कुटुंबियांची साथ आणि यशाचे श्रेय :
अभिजीत यांच्या या संपूर्ण संघर्षमय आणि खडतर प्रवासात त्यांच्या कुटुंबियांची साथ अत्यंत मोलाची ठरली आहे. त्यांचे भाऊ राहुल मोरे, लहान भाऊ आशिष मोरे आणि त्यांच्या मोठ्या चुलती यांनी प्रत्येक चढ-उताराच्या टप्प्यावर अभिजीत यांना मानसिक आणि भावनिक प्रोत्साहन दिले. कुटुंब पाठीशी खंबीरपणे उभे राहिल्यामुळेच आपण इथपर्यंत पोहोचू शकलो, अशा भावना अभिजीत यांनी व्यक्त केल्या.
आज अभिजीत मोरे यांचा हा प्रवास केवळ एका पदवीपुरता मर्यादित नसून, प्रतिकूल परिस्थितीसमोर न झुकता आपल्या स्वप्नांसाठी शेवटपर्यंत लढणाऱ्या प्रत्येक तरुणासाठी एक मोठी प्रेरणादायी कहाणी ठरली आहे.
"अभिजीत मोरे यांचा प्रवास खरंच प्रेरणादायी आहे. अथक प्रयत्न, जिद्द आणि मेहनतीच्या जोरावर त्यांनी संघर्षातून यश मिळवले आहे. त्यांचा संघर्ष खूप मोठा आहे, पण परिस्थितीसमोर न झुकता त्यांनी आपले ध्येय पूर्ण केले. अनेक अडचणींवर मात करत त्यांनी वकिलीची पदवी मिळवली, ही खरोखरच अभिमानास्पद आणि कौतुकास्पद गोष्ट आहे. अभिजीत मोरे हे फक्त स्वतःसाठी नाही तर अनेकांसाठी, तरुणाईसाठी एक आदर्श आहेत.त्यांची मेहनत, चिकाटी आणि सकारात्मक विचारसरणी प्रत्येकाला प्रेरणा देणारी आहे. अशी प्रतिक्रिया पुण्यातील प्रसिद्ध विधीज्ञ अॅड. सोनाली काळे यांनी महाराष्ट्र गर्जना न्यूजशी बोलताना दिली.
“लहानपणापासूनच अभिजीत मेहनती आणि जिद्दीने काम करणार आहे. परिस्थितीमुळे अपूर्ण राहिलेले स्वप्न अभिजीतने प्रचंड कष्टाने पूर्ण केले.अभिजीत लहानपणापासूनच खूप मेहनती आणि जिद्दी स्वभावाचा आहे. परिस्थितीमुळे त्याला उच्च शिक्षण घेताना अनेक अडचणींचा सामना करावा लागला, याची खंत मनात होती. मात्र त्याने कधीही हार मानली नाही. आपल्या मेहनतीच्या आणि चिकाटीच्या जोरावर आज त्याने ते अपूर्ण राहिलेले स्वप्न पूर्ण केले आहे. घरात आई नसतानाही मुलांनी परिस्थितीची जाणीव ठेवत सर्व जबाबदाऱ्या खंबीरपणे पार पाडल्या. अडचणीच्या काळात एकमेकांना साथ देत त्यांनी हा प्रवास पूर्ण केला. आज अभिजीतने मिळवलेले यश पाहून आम्हाला अभिमान वाटतो. आज त्यांची आई असती तर तिचे मन आनंदाने भरून आले असते.”
“अभिजीतचा संघर्ष, सातत्य आणि ध्येयासाठीची तळमळ हीच त्याची खरी ओळख आहे. त्याने स्वतःच्या आयुष्यातील अडचणींवर मात करत समाजासाठी काहीतरी करण्याचा मार्ग निवडला, ही आमच्यासाठी अभिमानाची बाब आहे.” अभिजीतचा प्रवास हा जिद्द, मेहनत आणि परिस्थितीवर मात करण्याचे प्रेरणादायी उदाहरण असल्याची प्रतिक्रिया अभिजीतचे वडिल अशोक मोरे यांनी महाराष्ट्र गर्जना न्यूजशी बोलताना दिली.
"समाजासाठी काहीतरी करण्याचे स्वप्न उराशी बाळगून संघर्षाच्या वाटेवर वाटचाल करणाऱ्या अभिजीत मोरे यांचा प्रवास अनेक विद्यार्थ्यांसाठी प्रेरणादायी ठरला आहे. त्यांच्या मेहनतीचा, जिद्दीचा आणि ध्येयासाठी केलेल्या प्रयत्नांचा जवळून अनुभव घेतलेल्या विद्यार्थ्यांमध्ये त्यांच्याबद्दल विशेष आदर आहे.
“अभिजीत सरांचा प्रवास हा फक्त यश मिळवण्याचा प्रवास नाही, तर संघर्ष, सातत्य आणि समाजासाठी काहीतरी करण्याच्या विचारांचा प्रवास आहे. परिस्थिती कितीही कठीण असली तरी ध्येयापासून विचलित न होता पुढे जाण्याची प्रेरणा आम्हाला त्यांच्याकडून मिळाली.”
“सरांनी आम्हाला केवळ अभ्यास शिकवला नाही, तर आत्मविश्वास, सकारात्मक विचार आणि मोठी स्वप्ने पाहण्याची शिकवण दिली. त्यांच्या संघर्षातून विद्यार्थ्यांना मेहनत, चिकाटी आणि जिद्दीचे महत्त्व समजते.”
अभिजीत सरांची समाजसेवेची तळमळ आणि लोकांसाठी काहीतरी करण्याची जिद्द ही अनेक विद्यार्थ्यांसाठी प्रेरणास्थान ठरत आहे. त्यांचा हा प्रवास निश्चितच अनेकांना नवीन दिशा देणारा आहे." अशी प्रतिक्रिया अॅड. नितीन चव्हाण यांनी महाराष्ट्र गर्जना न्यूजशी बोलताना दिली.
पुढील ध्येय: न्याय क्षेत्रात प्रभावी काम करण्याचा संकल्प :
समाजातील गरजू आणि वंचित लोकांना कायद्याच्या माध्यमातून न्याय मिळवून देणे हेच आता अभिजीत मोरे यांचे मुख्य ध्येय आहे. केवळ वकिली व्यवसाय करणे हा त्यांचा उद्देश नसून, समाजसेवेचे त्यांचे जुने स्वप्न आता ते कायद्याच्या माध्यमातून साकार करणार आहेत. आपल्या पुढील वाटचालीबद्दल बोलताना त्यांनी सांगितले की, त्यांना आता LL.M (कायद्याव्यतिरिक्त पदव्युत्तर पदवी) पूर्ण करायची आहे. उच्च शिक्षण घेऊन न्याय क्षेत्रात अधिक प्रभावी भूमिका बजावणे आणि समाजातील शेवटच्या घटकाला कायदेशीर मदत मिळवून देणे, हाच त्यांचा पुढील संकल्प आहे.
अभिजीत मोरे यांचा हा प्रवास थॉमस अल्व्हा एडिसन यांच्या एका सुप्रसिद्ध विचाराची आठवण करून देतो “स्वप्न मोठे असेल तर अडथळेही मोठे असतात; पण जिद्द आणि मेहनत असेल तर यशाचा मार्ग नक्की खुला होतो.” एडिसन यांचे हे वाक्य अभिजीत मोरे यांनी आपल्या कर्तृत्वाने तंतोतंत खरे करून दाखवले आहे. त्यांच्या या यशाबद्दल आणि पुढील वाटचालीसाठी सर्व स्तरातून त्यांच्यावर कौतुकाचा वर्षाव होत आहे.
प्रत्येकाच्या आयुष्यात काही ना काही दुःख, अडचणी येत असतात परंतु अशा अडचणींमुळे, संकटांमुळे खचून न जाता, जिद्दीने, चिकाटीने मेहनत केली तर तुम्ही तुमचे स्वप्न नक्कीच पूर्ण करू शकता.
