फलटण, दि.30 : - केंद्रीय माहिती व प्रसारण मंत्री प्रकाश जावडेकर यांनी व्हिडिओ कॉन्फरन्सिंगच्या माध्यमातून फलटण ते पुणे या डेमू रेल्वेला हिरवा झेंडा दाखवून फलटण - लोणंद - पुणे रेल्वेचा शुभारंभ केला.
पुणे-लोणंद-फलटण दरम्यान डेमु रेल्वे सेवा आज मध्य रेल्वे कडून सुरू करण्यात आली. अनेक वर्षांपासून प्रलंबित असलेले हे काम मार्गी लागल्याने नागरिकांना मनस्वी समाधान मिळाले. आजपासून सातारा व पुणे जिल्ह्यातील सर्व प्रवाश्यांसाठी हा नवीन प्रगतीचा मार्ग खुला झाला असून याचा फायदा शेतकरी, कार्यालयीन लोक, विद्यार्थी तसेच सर्वसामान्य लोकांना होणार आहे.
खासदार प्रकाश जावडेकर,( पर्यावरण, वन व हवामान बदल, माहिती व प्रसारण, अवजड उद्योग व सार्वजनिक उपक्रम मंत्री, भारत सरकार) यांनी आज नवी दिल्लीहून व्हिडिओ कॉन्फरन्सिंगद्वारे फलटण ते लोणंदमार्गे पुणे या डेमू ट्रेनला हिरवा झेंडा दाखवून रवाना केले.
या कार्यक्रमा प्रसंगी राज्याचे उपमुख्यमंत्री अजित पवार, विरोधी पक्ष नेते देवेंद्र फडणवीस, सहकार व पणन मंत्री व सातारा जिल्ह्याचे पालकमंत्री बाळासाहेब पाटील; माढ्याचे खासदार रणजितसिंह नाईक निंबाळकर, खासदार उदयनराजे भोसले, खासदार गिरीश बापट, खासदार श्रीनिवास पाटील, आमदार चंद्रकांत पाटील, आमदार दीपक चव्हाण, खासदार सुप्रिया सुळे, फलटण नगराध्यक्ष श्रीमती निता नेवासे यासह इतर मान्यवर या प्रसंगी व्हिडिओ लिंकद्वारे सामील झाले.
सुनीत शर्मा, (अध्यक्ष व मुख्य कार्यकारी अधिकारी, कार्यकारी अधिकारी, रेल्वे बोर्ड) पुनेंदू मिश्रा सदस्य (परीचालन व व्यवसाय विकास -ओ अँड बी डी), रेल्वे बोर्ड, नवी दिल्लीहून सामील झाले.
छत्रपती शिवाजी महाराज टर्मिनस, मुंबई येथून मध्य रेल्वेचे महाव्यवस्थापक संजीव मित्तल यांनी स्वागत केले.
खासदार प्रकाश जावडेकर यावेळी बोलताना म्हणाले " रेल्वे, वाणिज्य व उद्योग, ग्राहक व्यवहार, अन्न व सार्वजनिक वितरण मंत्री माननीय श्री पीयूष गोयल यांच्या मार्गदर्शनाखाली रेल्वेमध्ये व्यापक बदल दिसतात. बायो-टॉयलेट्सच्या परिचयामुळे ट्रॅक आणि स्टेशन प्लॅटफॉर्म स्वच्छ झाले आहेत. स्वच्छ भारत यांचे हे एक आदर्श उदाहरण आहे.
रेल्वेमंत्री म्हणून श्री पीयूष गोयल यांच्या नेतृत्वात आयआरसीटीसीवरील आरक्षणामुळे प्रवाशांना तिकिटे जलद मिळण्यास मदत झाली असेही त्यांनी नमूद केले. सर्वोच्च मानकाची सुरक्षा सुनिश्चित करण्यासाठी मानवरहित रेल्वेमार्ग क्रॉसिंगचे उच्चाटन, विद्युतीकरणाची प्रगती, रेल्वे मार्गांचे दुहेरीकरण, रेल्वेची बंदर कनेक्टिव्हिटी या पायाभूत सुविधांमुळे अर्थव्यवस्था व विकासाला चालना मिळाली आहे. ५००० हून अधिक रेल्वे स्थानकांत वाय-फाय प्रदान करण्यात आले आहेत, ज्यामुळे प्रवाशांना वर्ल्ड वाईड वेबवर जाता येईल आणि त्यांचे ज्ञानाचे क्षितिज उघडले जाईल."
फलटण-पुणे डेमू ट्रेन : पार्श्वभूमी : -
फलटण ते पुण्यादरम्यान लोणंद मार्गे रेल्वेगाडी सुरू झाल्याने या भागातील लोकांना आणि शेतक-यांना नवीन बाजारपेठेत पोहोचण्यास, विद्यार्थ्यांना त्यांच्या आवडीच्या शैक्षणिक संस्थांमध्ये आणि कामगारांना अधिक रोजगार मिळण्यास मदत होईल.
रेल्वे सर्वात स्वस्त वाहतुकीचा मार्ग आहे आणि पुणे ते फलटण दरम्यान लोणंदमार्गे थेट संपर्क असणे या प्रदेशासाठी एक वरदान ठरणार आहे.
यामुळे फलटणमधील रहिवाशांना फलटण ते पुणे आणि परत अशी थेट प्रवासी रेल्वे कनेक्टीवीटी मिळेल.
खासदार रणजितसिंह नाईक निंबाळकर यांच्या पाठपुराव्याला व अथक प्रयत्नांना मोठे यश आले आहे. सातारा व माढा मतदारसंघासाठी केंद्रीय रेल्वे मंत्रालयाने खूप मोठी भेट दिली आहे.
या भव्य शुभारंभ कार्यक्रमाचे आज फलटण रेल्वे स्टेशन येथे आयोजन करण्यात आले. यावेळी केंद्रीय मंत्री प्रकाश जावडेकर यांनी व्हिडिओ कॉन्फरन्स द्वारा हिरवा झेंडा दाखवत या प्रगतीच्या मार्गाचे प्रस्थान केले. यावेळी माजी मुख्यमंत्री देवेंद्र फडणवीस, माढाचे खासदार श्री रणजितसिंह नाईक निंबाळकर, विभागीय रेल्वे अधिकारी तसेच राज्यातील व सातारा जिल्ह्यातील सर्व नेते मंडळी उपस्थितीत होते.
फलटण-पुणे रेल्वेचे वेळापत्रक : -
31 मार्च पासून नियमितपणे सुरू होणारी सेवा खालीलप्रमाणे असेल
1) 01435 DEMU पुण्याहून सकाळी 5.50 ला निघून रेल्वे लोणंद येथे 7.50 ला पोहोचेल त्यानंतर 8.00 वाजता लोणंदहून निघून सकाळी 9.35 वाजता फलटणला पोहोचेल.
2) 01434 सकाळी 11.00 वाजता फलटणहून निघेल आणि दुपारी 12.20 ला लोणंद येथे पोहोचेल.
3) 01433 दुपारी 3.00 वाजता लोणंदहून निघेल आणि 4.20 वाजता फलटणला पोहोचेल
4) 01436 संध्याकाळी 6.00 वाजता फलटणहून निघेल आणि संध्याकाळी 7.10 वाजता लोणंदला पोहोचेल. 7.20 ला लोणंदहून निघून पुण्यात रात्री 9.35 ला पोहोचेल.
ग्रामीण भाग व पुणे शहराला जोडणारी ही रेल्वेसेवा नक्कीच भविष्यात विकासाची नवीन दिशा नागरिकांसाठी घेऊन येईल.
